Sizin reklam burada
Sizin reklam burada

Alimpaşa Məmmədovla tikinti işini inhisara alan iş adamı Famil Xəlilov kimdir? - Parkı ona satıb, rüşvət kimi də ev alıb

Alimpaşa Məmmədovla tikinti işini inhisara alan iş adamı Famil Xəlilov kimdir? - Parkı ona satıb, rüşvət kimi də ev alıb




Şəmkirin həbs edilən İH başçısının cinayət əməlləri ilə bağlı bəzi yeni təfərrüatlar üzə çıxıb.

Cinayət Məcəlləsinin mənimsəmə və rüşvət alma maddələri ilə ittiham olunan Alimpaşa Məmmədovun kimdən və hansı məqsədlə rüşvət alması, kimlərlə əlbir olması məlum olub.

Alimpaşa Məmmədovun həbsinə səbəb rayondakı korrupsiya halları, aparılan qanunsuz tikililər, habelə şəhərin baş planına uyğun gəlməyən, tikinti normativlərini ciddi şəkildə pozan çoxmərtəbəli binalara verilən qanunsuz icazələrdir.

Musavat.com-un əldə etdiyi məlumata görə, qanunsuz tikililər isə “Park Kolizey” MTK adlı tikinti şirkəti tərəfindən aparılıb.

Məlumata görə, Alimpaşa Məmmədov rayonda tikinti monopoliyası yaradıb və qeyri-qanuni olaraq digər tikinti şirkətlərini rayona buraxmayıb.

Ancaq xüsusi imtiyaza malik olan “Park Kolizey” MTK şəhərin ən görkəmli yerlərində çoxmərtəbəli yaşayış binaları üçün nəzərdə tutulmayan ərazilərdə də tikintilər aparıb.

Belə ki, “20 Yanvar” abidəsinin ətrafında salınmış park sonradan hansısa yollarla çoxmərtəbəli yaşayış binasi üçün ayrılıb və artıq burada binanın tikintisi yekunlaşmaq üzrədir. Bildirildiyinə görə binanın tikintisinə icazə almaq üçün MTK rəhbəri Famil (Veyis) Xəlilov nə az nə çox bir neçə çoxotaqlı mənzildən keçməli olub. Binanın bir mərtəbəsinin mənzillərini birləşdirərək Alimpaşa Məmmədova, 4 otaqlı bir mənzili rayonun baş memarı İlqar Quliyevə və hal-hazırda həbs olunan digər aidiyyatı şəxslərə rüşvət olaraq verib.

Bundan əlavə, Famil Xəlilov həmin parkın ərazisini almaq üçün Alimpaşa Məmmədova 1 milyon 300 min manat da pul veribmiş. Xəlilov bunu etiraf edib.

Alimpaşa Məmmədov şirkət rəhbəri F.Xəlilova rayonun İsrafil Məmmədov və ya 4-cü küçə adlandırılan ərazisində tikinti aparmağa da şərait yaradıb.

Belə ki, tikintisinə yalnız 6 mərtəbə olmaqla icazə verilən bina 9 mərtəbə olaraq tikilib. Maraqlıdır ki, binanın məhz 6 mərtəbəyə qədər icazə verilməsi həmin ərazidə hərbi hissənin yerləşməsi ilə bağlı olub.

Binanın tikintisi hərbi obyektlərlə bağlı normativi pozduğundan yolverilməz olsa da hansısa yollarla 9 mərtəbəli bina tikilib.

İşin maraqlı tərəfi budur ki, tikiniti üçün razılıq Şəmkir korpusundan da alınıb. Bu icazəni kimin verdiyi də araşdırılır.

Bu işdə adı keçən Famil Xəlilov kimdir və Alimpaşa Məmmədovla əlaqələri nə zaman yaranıb?

Xəlilov qardaşları zamanında Sankt-Peterburq şəhərində ticarətlə məşğul olublar. Onların MTN-nin həbs olunan vəzifəli şəxsləri ilə əməkdaşlıqları barədə də məlumatlar var. Hətta Famil Xəlilovun Akif Çovdarovu ətrafına doğmaca dayısı kimi təqdim edirmiş.

MTN-nin qanunsuz əməlləri, iş adamlarına təzyiqləri davam edən ərəfədə Famil Xəlilov bu münasibətlərdən yaxşı istifadə edə bilib və fəaliyyətini genişləndirib. Onun Alimpaşa Məmmədovla yaxın münasibətləri də həmin ərəfəyə təsadüf edir.

Xatırladaq ki, Famil Xəlilovun adı müğənni Şəbnəm Tovuzlunun MTN-ə aparılması qalmaqalında da hallanırdı. Məlum olmuşdu ki, iş adamı ilə Şəbnəm Tovuzlu arasında münasibət olub və sonra Famil Xəlilov qisas almaq üçün MTN-dəki əlaqələrindən istifadə edərək ona təzyiq göstərirmiş.
Musavat.com

***

Dövlət Təhlükəsizliyi Xidməti tərəfindən həbs edilən Şəmkirin sabiq icra başçısı Alimpaşa Məmmədovun ittiham olunduğu cinayət işlərinin motivi məlum olub.

“Qafqazinfo” xəbər verir ki, A.Məmmədovun həbsi üçün səbəblərdən biri də rayonda aparılan qanunsuz tikililər, şəhərin baş planına uyğun olmayan, tikinti normativlərinin pozulduğu binalarin tikintisinə qanunsuz icazə verməsidir.

Yaşayış binaları isə əsasən “Park Kolizey” MTK adlı tikinti şirkəti tərəfindən aparılıb. Məlumata görə, A.Məmmədov rayondakı bütün işləri bu tikinti şirkətinə tapşırırmış. Şəmkir şəhərində “20 yanvar” abidəsinin ətrafında salınmış park da sonradan “Park Kolizey” MTK-nın çoxmərtəbəli yaşayış binası tikməsi üçün ayrılıb. Artıq binanın tikintisi yekunlaşmaq üzrədir.

Məlumata görə, tikintiyə icazə almaq üçün MTK rəhbəri Famil Xəlilov (Veyis Xəlilov) binanın bir mərtəbəsinin mənzillərini birləşdirərək Alimpaşa Məmmədova verib.

Həmin binadan əlavə 4 otaqlı bir mənzili isə rayonun baş memarı İlqar Quliyevə və hal-hazırda həbs olunan digər aidiyyatı şəxslərə rüşvət olaraq verib. Veyis Xəlilov həmin parkın ərazisini, torpaq sahəsini almaq üçün Alimpaşa Məmmədova 1 milyon 300 min manat da pul verib, ilkin dindirilmə zamanı bunu etiraf edib.

Famil Xəlilov öz ətrafında həm də ikinci adı olan Veyis Xəlilov kimi tanınır. O, müğənni Şəbnəm Əsədovanın (Tovuzlu) əridir.

Alimpaşa Məmmədov şirkət rəhbəri Veyis Xəlilova rayonun İsrafil Məmmədov və ya 4-cü küçə adlandırılan ərazisində tikinti aparmağa da şərait yaradıb. Belə ki, ətrafında hərbi hissənin yerləşməsi nəzərə alınaraq Şəmkir Korpusunun o vaxtkı komandiri, hazırda həbsdə olan general Rövşən Əkbərov binanın 6 mərtəbəli olmasına razılıq verib. Lakin icazə verilən sənəddə 6 mərtəbə olması nəzərdə tutulan binanın tikintisi hərbi obyektlərlə bağlı normativ pozularaq 9-cu mərtəbədə yekunlaşıb.

A.Məmmədovdan 1,4 milyon dollara park alan Veyis (Famil) Xəlilov “MTN işi” zamanı həbs edilən general Akif Çovdarovla da yaxın əlaqələrinin olduğu bildirilir. İddiaya görə, onun Alimpaşa Məmmədovla münasibətləri də MTN xətti üzərindən reallaşıb.

Rəsmi açıqlamaya görə, Alimpaşa Məmmədov Şəmkir rayonu ərazisində dövlət büdcəsindən ayrılan vəsaitlər hesabına tikinti və abadlıq işləri, əsaslı və cari təmir, habelə yolların təmir edilməsi ilə bağlı işləri yerinə yetirən ayrı-ayrı şəxslərdən ümumilikdə 382 min manat, rayon ərazisində sahibkarlıq və yaşayış təyinatlı tikinti işlərinin aparılması ilə bağlı ayrı-ayrı vətəndaşlardan ümumilikdə 217 min manat vəsaiti tabeçiliyində olan şəxslər vasitəsi ilə rüşvət qismində istəyərək alıb.

  • Sosial şəbəkədə paylaş
XƏBƏR LENTİ